كل سنة وانتم طيبين وياعاساكم سالمين > مسكت خط .. تقبل الله منا ومنكم صالح الاعمال ..

للمعلومية هذا الموضوع كتبته لمنتدى المعالي فاي خطمه عنه لاتقولون وش دخله ^^

اخبار البنات والعجوزات والحريمات كل ابوهم ووش مسوين مع العيد ان شاء الله مبسوطين اكثر شيء تجهزوا بسولف عليكم سواليف سنة تعرفون اللي ماتنزل موضوع الا من السنة اليه لزومن تضيع اللياقة وتطول الخنبقة وهه وهه

الصراحة ببالي موضوع يقرقع وده يطلع من زمان , كل عيد تتجدد القرقعه ولكن مايقسم الله انزله الا هالسنة فالحمد الله على كل حال

* شيء يضيق الصدر /

شيء يضيق الصدر ملابسنا وأزيائنا يالبنات والنساء بشكل عام .. يعني بالله يعجبك انك تلبسين قصير مطلعه نص سيقانك كان مو كلهن بعد والفخوذ زياده .. ولا عاري ايدينك واكتافك طالعه هذا اذا ماكملتي الظهر والصدر بعد .. ولا شفاف ولا ولا والله يابعض البنات اني اذا شفته اصد عنه من قبح اللبس اللي عليه مايناسبه ولاشي الله لايبلانا بس عشان تصير ع الموضة ومع الناس ياحبيبتي خلك مميزة عن الكل بلبسك لكن مو على حساب دينك وعفافك وسترك :/ .. ماأقول ان اللبس الفاضح يشين الكل لا والله يابنات ان اللبس القصير والعاري عليهن يخرش البنت وشلون لاشافه الرجل لكن مهما كان اكيد مافيه بنت راح تتنازل عن كرامته بمجرد لبسه لهاللبس ..

* قناعة /

عندي قناعه انه مافيه بنت ماتعرف الاحاديث اللي تنهى عن هذا النوع من الملابس .. والآيات اللي تنهى عن اتباع الهوى .. وقصص الصحابيات مع الستر والعفاف .. لكن فيه بنت الله يهديه ويصلحه تنقز وتتعدى الآيات والاحاديث وتتبع اقوال الشيخ الفلاني ولا العلاني :/ .. يعني ياختي ماأرضاك قول الله ورسوله ..! انا متأكده انه مافيه بنت ترضى تكون من هذا الصنف لكنه هي منهم بدون ماتشعر .. وعشان تعرفين انتي منهم ولا لا جاوبي نفسك على سؤال : ليه تلبسين هاللبس الفاضح ؟ .. وبتعرفين نفسك ^^ لذلك يابنات ياحبيلكم صححوا قناعاتكم تتصحح افعالكم اللي منها طريقة لبسك ونوعيته .. ويشهد ربي على كلامي اني ماكتبت هالكلام الا لحبي لكم وخوفي عليكم وعلى مصيركم .. هذا شيء ,

الشيء الثاني مو حنا مسلمات عربيات وبعضنا سعوديات ! أسألكم بالله أزيائنا اليوم تدل على هوياتنا ؟ يعني لو وحده تشوفك من بلد ودين غير ماتعرف عنك شي تتوقعون تعرف انك مسلمه من لباسك ؟ فيه مقولة مادري حكمة مادري مثل (اختاري اللي يعجبكم ) تقول كن متبوعا ولاتكن تابعا .. او حول الدعوى ( حتى الكلام شاكتن به ) ليه حنا تابعين مو متبوعين .. ليه الكفار يخططون وحنا ننفذ ! ليه العاهرات يلبسون وحنا نقلد ! ليه مايعجبنا الا لبس الاجانب ونزهد بحضارتنا وازيائنا اللي لو اكتشفوها الغرب كان لامونا وراه ماطلعنا لهم دررنا وابداعاتنا ! على طاري الموضة والازياء ومادري شنو عندي فوكره خطيرة اقرب ماله خيالية الا شوي =) تنفيذه يحتاج جماعة مو وحده ولاثنتين وبما ان بنات المعالي معروفات بنشاطهم المميز وابداعاتهم اللي مايعلى عليه ماشاء الله حبيت اطرح الفكره لعل احد او احده تتبناه راح ادرجه بأول رد هنا ..

* خواطر /

_ اللبس الساتر يسعد غالبية امهاتنا وجداتنا ان ماكان كلهن الله يحفظهن ..
فانت مثلا اذا لبستي ساتر كسبتي حسنة .. واقتديتي بالسنة باللبس بحيث تبدين باليمين كسبتي حسنة .. ورحتي لامك تقولين له وش رايك بلبسي وانبسطت على تسترك برضو كسبتي حسنة .. وطلعتي به للناس ولاشافوا منك شيء كسبتي حسنة .. واعجب بنوته ثانية وقلدتك بحيث صرتي له قدوة كسبتي حسنة .. هذي بس خمس حسنات على تغيير نمط لبسك للساتر وانا بخيلة وماعطيتك الا حسنة لكل فعل لكن الله اكرم واعظم بالعطايا سبحانه .. هذا غير الدعوات من امهاتنا الكبار الله يخليهم , والتاثير بعيد المدى لكل من يشوفك , والراحة اللي تحسين به لاتباعك الصواب , والرضا عن الذات واكثر واكثر ربما ماكتشفته انتي بذاتك راح تكتشفينه

_ بعض الاشياء بالحياة تحسين لها خصوصية ماترضى اي انسان يطلع عليه .. مثل جوالك , درجك , حسابك , مذكرتك الخاصة ماتحبين اي احد يطلع عليهن صح ؟ جسمك مثلهن بالضبط وشخصيا اعتبر بعض مناطق الجسم لها خصوصية ماأسمح لاحد يشوفهن .. مو عاد اروح اطلعهن انا بنفسي واقول للناس تفضلوا وشوفوا براحتكم :/ .. لا ابدا مستحيل بنت ترضى بهالشيء ..

* طريقة عملية للتغيير /

بالاخير حبيت اوضح بعض الطرق العملية للتغيير من نظرتنا للموضة ونمط أزيائنا وملابسنا .. فحنا اليوم سيدات العالم وبيدنا التغيير ورفع امتنا للأعلى .. أما زمان التبعية ولى , وزمان التقليد وانتم خططوا وحنا ننفذ كمان ولى .. حنا اقوى من كل هذا واقدر على تحدي أهوائنا اللي ماراح تفيدنا بل تضرنا وتغويينا وتحدي الغرب وتحدي العدو الاخفى وهو ابليس الضعيف اللي يظن انه يقدر علينا خابت امانيه ..

_ اول شيء طبعا احتساب الاجر بكل خطوة نسويه فتغيير المنكر شي مش سهل لكن اذا طمعت الوحده بما عند الرحمن سهلت كل الدروب ..

_ تخلصي من كل الملابس الفاضحة والتخلص لايكون برميها ( يذبحونن اهلكم الحين ) لكن يكون باكمالها وتستيرها ماأمكن .. والعزم على عدم شرائه المرات الجاية ..

_ الفتي انظار الناس اللي يحبون الستر للبسك لان تشجيعهم لك وتحفيزك يزيدك باذن الله تمسك به .. وكذلك ارسلي لنفسك رسائل ايجابية باستمرار فالبعض يرى فعالية هذه الطريقة بالثبات … وبالمقابل انتبهي تفتحين اذانك للي يشكك بلبسك ونفسك كوني واثقة من نفسك ولايهمك كلام المثبطات وهم كثار هالايام بل كوني امرأة حديدية لاتتاثر باي ريح …

_ ذوقك هو ذوقك بالطويل او القصير نفس الشيء .. فلايروح بالك ان ذوقك صار هراديس ولا شيء لانه اللي راح يتغيير نمط اللبس بس مو الذوق ..

_ تذكري انه كل وحده تعجب بملابسك وراحت تقدي بك انك كسبتي اجر القدوة الحسنة ونغبطك على ذلك ..

* بالاخير ..

حبيت اقول اكيد وحدة منكم تقول هذه ماتشوف اللبس الشين الا بالعيد ..! هو ينشاف بكل وقت لكن بالعيد بشكل كبير وملفت حتى بعض اللي مايلبسون بالايام العادية تلبس بالعيد الله يهديه يارب ..

وهذي خطرات احرقت فؤادي وأبت الا ان تنقز لبنات المعالي وكل من يقرأ ^^ اسأل الله ان ينفع بها وغضوا الطرف عن الخطأ والنقص ..

وكل سنة وانتو متسترين

…

تلاحظون أغلب الاشياء اللي أُدخلت علينا كانوا الغرب يبون يخربون علينا عن طريقه ولكن المسلمين بفضل الله حولوها لاستخدامات تفيدهم في دينهم اولا ودنياهم مثل الجوال والكاميرا والنت والمسرحية والرواية وغيره وغيره .. الا الموضة للحين ماسمعت طلع فيها توجه اسلامي ليه >< ليه مانخلي المعالي يكون الرائد بهذا المجال بحكم توجهه الواضح ولانه للحين ماسمعت احد التفت للتغيير العملي فعلا .. اخليكم مع تفاصيل الفوكره الخطنطرية

* اسم الفكرة /
الموضة الاسلامية …

* مفهومه /
نصوغ لنا أزياء وموضات من حضارتنا وابداعاتنا فما ينقصنا شي عنهم عشان نتاخر عنهم .. ولنا اذواقنا الخاصة واتجاهاتنا المختلفة عن الغرب فماعاد ينفع لنا لبسهم ولا ازيائهم وموضاتهم ..
فكرت يكون فيه موقع خاص للموضة الاسلامية يجمع فيها كل المصممات المسلمات المتحمسات لهذي الفكرة ويكون فيه كل موسم موضة معينة لها اكثر من تصميم .. بحيث تكون هي مرجع الموضة الاسلامية الساترة والناعمة والجميلة .. واذا توجنا جميعا بلا استثناء للملابس اللي تناسب موضتنا وبس عرف الغرب ايش نحب وايش نكره .. فبكذا نجبره على انه يصيغ لنا اللي نبيه حنا مو هم ^^

* تكاليف الفكرة /

اتوقع ماراح تكلف اكثر من تكاتف المتحمسات وفتح موقع وتنسيق مع المصممات وحملة اعلامية ضخمة ..

…

الفكرة ان اعجبتكم تحتاج دراسة اكثر لاني هنا كتبته بشكل مبدئي .. وشوكرن لحوسن قرائتكم

كتبته / سُحُب

1430/10/2 هـ

هذه التدوينة دونت بتاريخ الثلاثاء, سبتمبر 22nd, 2009 بتمام 5:42 ص مدرجة تحت تصنيف || اهتمامات أنثى. بإستطاعتك متابعة أي تعليق جديد من خلال RSS 2.0 feed. بإستطاعتك ترك تعليق على التدوينة.