السلام عليكم ورحمة الله وبركاته

ليتجدد العطاء وتتجدد النفوس .. لابد من راحه وسياحه تفصل بين

الاعمال والواجبات .. لا أحد يقلل من شأن السياحه والترفيه مهما كان

نوعها فلها من الآثار النفسية والروحانية والجسدية الكثير ..

هدية أوزنجولية لزواري المحترمين ( الحقاق بمعنى آخر ) وهي عبارة عن تقرير

بسيط لرحلتنا الى اوزنجول ..

في صيف 1430هـ احتارت العائلة في تحديد وجهة السياحه خاصة ان

الخريجين هالسنة ثلاثة هذا غير المتميزين ^^ .. ورست أخيرا سفينة

الاختيار على شواطئ ( تركيا ) سفرا بريا مرورا بالأردن وسوريا ^^

…

بدأت الاستعدادات للرحلة بالتشاور لمدة الرحلة وتكاليفها وتجهيزات

الجوازات وغيره .. وكنا ثلاثة عوائل مما أضاف للرحلة رونق خاص ومذاق

لا يقاوم ()

ومن الحماس ولعلمنا ان تركيا لاتجيد العربية ولا الانجليزية بدأنا نتعلم

اللغه التركية .. كلمات بسيطه يعني على قدنا من الانترنت

10 / 8 / 1430 هـ

فجر يوم السبت انطلقت العائلتان اللي معنا وتغدوا على حدود الأردن

ولما رأوا الوقت مبكر دخلوا الأردن وسوريا وناموا فيها .. وتأخرنا عنهم

الى العصر لظروف .. وصلنا طبرجل بالليل ونمنا فيها .. صراحة توي

ادري ان طبرجل بالسعودية دايم اسمع به احس انها تابعه للاردن

.. طبعا طول الطريق احاديث شوق وحماس للرحلة وتوقعات

للاحداث وكذا ^^ كان يمر الوقت بسرعه بدون مانحس ياربي لك الحمد

^^

…

11 / 8 / 1430 هـ

بعد صلاة الفجر والفطور تحركنا من طبرجل وطلعنا من السعودية مع منفذ

الحديثه و دخلنا الحدود الأردنية مع منفذ العمري .. ماحسينا بالأردن أبد

لاننا مادخلنا فيها مدن ولا قرى على طول ع سوريا ^^ .. ومن دخلنا

الاردن ومحمول الوالد الله يحفظه مفتوح على التقارير لبعض الرحالة اللي

منزلين الطريق بالتفصيل من السعودية لاوزنجول .. وبعض الخرائط على

المحمول وعلى القارمن نتابع الطريق بالدقة .. وهذي اول صورة التقطته

بالرحلة .. وهي لوحة مدينة اردنيه نمر من حوله بعد مدينة الازرق اللي في

بداية الاردن من ناحية السعودية ..

[ تصويري كان بجوال N86 ]

(1)

واصلنا لين وصلنا سوريا

(2)

ودخلناه من منفذ الرمثاء واول مدينة مادري

قرية واجهتنا وقفنا فيها وصلينا وتغدينا ..

هذي صورة من دورات المياه وانتم بكرامه التابعات للمسجد .. لفت

انتباهي اهتمامهم فيه ونظافته رغم انه مو جديد ..

(3)

بالطريق شفت لوحة دمشق تحمست لزيارته ماعرفه الا بكتاب التاريخ والجغرافيا كان نفسي نزوره والحمد لله تحقق لي ذلك لكن بطريق الرجعة ..

(4)

كملنا طريقنا شدة وحده لخويانا بمدينة كسب اللي على الحدود التركية ..

وصلناهم بالليل ( تافلين العافية ) .. وتعشينا ونمنا .. طبعا هذي كسب ديرة نصارى غالبيته وفيها كنيسه ..

…

12 / 8 / 1430 هـ

جوالي بذا الوقت قاضي شحنه ولادريت عنه ويوم قمت وشفت المناظر

الخلابه واتذكر ان لي كائن اسمه جوال .. لكن شرهته علي كبيره

وماخلص شاحن الا يوم تحركنا من الفله .. لكن اخذت صوره من خويتنا سماسم ^^

(5)

هذي الجنينه مثل مايسمونها اخواننا السوريين ^^

(6)

تقهوينا وافطرنا ومشينا من الفلة .. وهذي صورة كمان من سماسم للقهوة

^^

(7)

خرجنا من سوريا بالصباح ودخلنا الحدود التركية .. تأخرنا بالاجرائات في

كلا المنفذين الاول كان فيه عطل بالحاسب والثاني وقت غدا :/ ماطلعنا

منهم الا حول العصر ..

(8)

من يوم مادخلنا تركيا وتبدأ المناظر الحلوة تزيد .. لدرجة من يوم مشينا

من الرس كنت اكتب كل شيء يصير والمدن والقرى اللي نمر عليه ويوم

دخلنا تركيا نسيت هالشيء لمدة 3 أيام ^^

هذي اولى القرى التركية ..

(9)

فيها شفنا سيارتين سعوديات .. تعرفوا علينا عند الاشارة وسالوا عن وجهتنا ولما عرفوا اننا راح نروح لاوزنجول طلبوا يكون معنا لين ذيك الديره .. وفعلا مشوا معنا وسعدنا بهم ^^

من الطريق ..

(10)

(11)

…

شفنا هذا الشيء ويكلمون الرجال بعض يقولون نبي ناقف عند هالحديقه

نتغدى ونصلي ونرتاح شوي .. يوم وقفنا وتصير مقبره مش حديقه ولا

يحزنون

(12)

(13)

(14)

كملنا المسير وكنا نحاول ماناقف واجد شوقا للقاء الأوزنجولي

واستقرينا هالليلة بمدينة سيفاز ..

اصحاب الشقة يطقطقون بالانجلش مايعرفون بالحيل ووقعدنا ساعة نقرق

معهم انا المترجم الانجليزي من ورى الباب والوالد واخوي بالعربي يحاولون يفهمونهم بعض الكلمات ..

واستانسوا ع الوضع ابوي يبي يدخل ينام وهم يوم خلصوا امور الشقة

بدت المقابله الشخصية والتعرف ع الثقافات ^^ > هذا كله بالاشارات

وبعض الكلمات

صوره للشقة .. والشقق بشكل عام بتركيا صغيرة مرره ..

(15)

(16)

…

13 / 8 / 1430 هـ

اخذنا فطورنا من زارا وطلعنا منه ندور مكان نفطر مع بعض لان الشقق

ماتسمح بالاجتماع ابد ..

لوحة زارا بعد ماطلعنا منه ..

(17)

مشينا مسافات حليله ^^ ثم وقفنا عشان الفطور عند اول نهر يصادفنا عند مدينة  زارا ..

(18)

أعجبنا هالجسر فيه رغم انه قديم وبدائي الا انه جميل ورايق ^^ وكان حوله تركي يصيد بشبكة ..

(19)

سوينا الشاهي والقهوة ومافيش مشاكل ووزعنا الفطور ومافيش مشاكل ..

ووصلنا للتونه ونكتشف ان المفكات كلها بـ ( العفش ) المربوط فوق

السيارة .. وش نسوي خلاص التونة مش ضرورية ويصرون ناسات عليه ^^

وطلعت مواهب بفك هالتونة لين انفتحت بعد مغامرات ومحاولات من أكثر من شخصه ثث ..

(20)

…

بعد ماتحركنا من هالمكان … بدأت مياه السبيل تكثر على الطريق اللي هي من مياه الانهار والشلالات يسوون لها صنبور يسهل للناس الشرب منها …

وقفنا عند واحد منها وشربنا وارتوينا وان كنا ماشبعنا ( ابن آدم طماع ) ماحصل لي اصوره لانه فيها ناسات ورجال .. في نفس المكان جاء رجلين ومرأه من الشرطة .. انخرشت قلت لانصير مسوين شي خطأ ولا شيء .. صاروا جايين يريحون عند الماء ^^ ومنزلين معهم بطيخ .. وبدا لنا هنا كرمهم ماشاء الله فبدوا يقطعون ويقدمونه لنا ..

(21)

شكرناهم وأعجبنا بموقفهم وكملنا الطريق ..

قررنا نختصر الطريق ونروح مع طريق قليل عرب تروح من عنده .. صدق مغامرة وخاصة أننا بدولة مانعرف فيها شيء لكن التوكل على الله ومتعة الطريق وطيبة السكان تريح الانسان وتطمئن قلبه .. كثير ناقف نتأكد من صحة الطريق والحمد لله توفر الخرائط والقارمن سهلت الامور .. وان شاء الله بنهاية التقرير راح انزل خريطة مسيرنا من البداية وحتى العودة لانه اختلف طريق العودة ان تيسر ..

ووصلنا أخيرا قرية أوزنجول بالليل وحنا بحماااس لرؤيتها نهارا .. لكن هذا مامنعنا اننا نتجول فيها بالليل للاكتشاف .. كنا نسمع صوت الماء بس والناس هدوووء والحركة بالليل قليلة .. وكان واحد جزاه الله عنا كل خير حاجز لنا شقق قبل مانوصل ..

~ الجزء الثاني ||

~ الجزء الثالث والأخير ||
ألقاكم على خير

تقرير / سُحُب
23 / 10 / 1430 هـ

الدلائل: أوزنجول, أوزنقول, تركيا, رحلة, سياحة, صور, صيف

هذه التدوينة دونت بتاريخ الإثنين, أكتوبر 12th, 2009 بتمام 3:37 م مدرجة تحت تصنيف || ابتسامة واستراحة. بإستطاعتك متابعة أي تعليق جديد من خلال RSS 2.0 feed. بإستطاعتك ترك تعليق على التدوينة.