السلام عليكم ورحمة الله وبركاته

> الجزء الاول من الرحلة <

14 / 8 / 1430 هـ

قمنا الصباح بعد مانفعصنا بأكواخهم الجميلة ..طلعت مع الامل نتمشى بالقرية على مايستعدون ويقررون الوجهه لهذا اليوم ..

وعلى هالصباح الجو روقاان وصوت عصافير ومياه () تخليك نشاط وحيوية غصبن عنك

كان صاحب الكوخ اللي حنا فيه شايب تووحفه .. حريص علينا مرره كأننا احفاده ^^ اول شيء طلب منا نطلع جزماتنا ( وانتم بكرامه ) برا الكوخ يعني نلبقهن عند الباب بالشارع هالعاده عند الاتراك اللي مرينا عليهم كلهم .. لدرجة يستغربون منا كـ سعوديين عربيين مسلمين مايهمنا هالشيء .. راضيناه وطلعناهن برى عشان خاطره ^^

وكل ربع ساعه جاي يتطمن ع الوضع ويلعب الصغار ويشرط لهم مابقى الا نقوله جدو اسماعيل ويصير جدنا التركي ..

بالبداية دورنا لنا اكواخ اوسع من اللي حنا فيها .. والحمد لله حصلنا اكواخ مناسبات وان كانن بعيدات شوي عن بعض لكن اوسع واريح من الاول .. ونزلنا اغراضنا بالكوخ ومشينا لاكتشاف المجهول

صور للكوخ الجديد ^^ تمنيت اني مصوره الاول لكن راحت علي ..

مدخل الكوخ من الداخل ..

(17)

بوفيه او سموه مطبخ ^^

(18)

غرفة النوم ..

(19)

المدخل من برى ..

(20)

(21)

> وش رايكم بحيل غسيل كوخنا العزيز

…

قريب الظهر ذهبنا لبحيرة الاسماك ( فيش قول ) القريبة من اوزنجول والبحيرة المستطيلة .. ولما وصلناه كانت قريبة من القرية تعديناه للاكتشاف ومذكور لنا ثلوج باعلى الجبال اللي حول البحيرة ..

وحنا بالطريق وقفنا نصور من فوق ووقف عندنا مراسل قناة تركية وصور ابوي واخواني وخلاهم يقولون نبذة بسيطه عن المكان وكذا بلغتنا طبعا ^^

حصلنا الثلوج وقفنا عندهن ولعبنا بهن فهي المره الاولى اللي نصادف ثلج بالطبيعة .. وكان اللعب فيها متعة .. وجدنا عليه توقيعات عربيه حديثه ^^ .. والغريب اللي للحين ماستوعبته وجود هالثلج في شهر اغسطس .. والشمس طالعه شيء غير قابل للاستيعاب

(22)

(23)

(24)

(25)

بعدنا ماشبعنا من الثلج رجعنا لبحيرة الاسماك وهذي صورة من مكان الثلج للبحيرة ^^

(26)

(27)

من محاسن الصدف كان في نفس الوقت على البحيرة ناس من بريده وناس من عنيزه وناس من الرس ^^

وبصراحة في هاليوم شمس وحراره وباعوض عكس كل التوقعات والتنبيهات اللي قرأنا عنها بالنت بان الجو بارد استعدوا بالملابس الشتوية ومن هالقبيل .. ويوم سألنا قالوا ماجاء الحر الا اليوم > يجوز انه جاي معنا .. بس ماطول ورجع الجو الخورافي وراح الباعوض والنامس ^^

هذا المكان اللي جلسنا فيه وغسلنا ملابسنا عنده

(28)

أول فطر شفناه .. وانصح المهتمين بالاحياء النباتي يروحون هناك ^^ من جد انواع كثيره ومتعدده للنباتات والورود والفطر اشكال والوان .. شيء يدعو للتأمل والتفكر ومانملك قول شيء امام هالمناظر الا قول سبحان الله ()

(29)

(30)

(31)

(32)

ولما دخل المغرب قعدنا شوي وصلينا ورجعنا لأكواخنا الفله () وكانوا ناويين يكملون داخل لكن ماحصل النوم والارهاق عامل عمايله ^^

وانتهى يوم جميل حافل بكل شيء حلو ورايق ()

…

15 / 8 / 1430 هـ

(33)

> الفجرية اليوم ^^

(34)

باقة ورد لزوارنا الاكارم ^^

(35)

طلعنا اليوم لجبل السكر ( شوقر سو ) ولكن الأجواء ماساعدتنا ع الجلوس ..

اكتفينا بالفطور ورجعنا للدكة ^^

وحنا بطريق الرجعه شفت هالسياره وابت نفسي الا تصويره حسيت فيه عادات دخيله عاد للحين لم يتم الاكتشاف هي دخيله علينا ولا عليهم ولا مشتركة ^^ والاحرى الاخيره ^^

(36)

كوخ خويانا ^^

(37)

بعد مارجعنا للاكواخ .. طلعنا نتمشى على القرية ونسولف مع أطفالهم وحريمهم .. وتعرفنا على يوسف وفتوش صدقيننا .. وصراحة كل يوم يمر يزيد اعجابي بالشعب التركي ..

* أشياء لفتت انتباهي ع الشعب التركي /

- كل مارعرفه بالسابق عن الاتراك انهم شعب علماني كدولتهم .. وبعض الاتراك العاملين بالسعودية يعكسون ذلك .. لكن تفاجأت بحرصهم على الدين واهتمامهم خاصة هالقرية اللي حنا فيها ..

- نسائهم متحجبات ومتسترات ..

- أطفالهم بالصبح يجتمعون بالمسجد ومعهم مصاحف وكتب ثانية .. أما فئة الشباب فقليل نصادفها هناك يبدو انه وقت دراسه ورايحين للجامعات بالمدن والله اعلم ^^

- اذا جيت للاخلاق فأخلاقهم قمة ماشاء الله فعلا يمثلون الاخلاق الاسلامية السامية ..

- عندهم في القرية أمان عجييب سبحان الله .. والمنطقة ككل لدرجة اشوف مواقف السيارات بسوق بطربزون سياراتهم مفتوحة مايحرصون على تقفيله والنوافذ للنص مفتوحه وبعضها كله مفتوح > تخيلوا بيسلمن لو انهن عندنا ..

- من جد نخجل من كرمهم وطهارة قلوبهم وسخائهم .. مرة كنت اسأل جارتنا أبي خباز حافظة كلمة خبز والباقي بالوصف .. حسيت انه مافهمت علي مشت وخلت ورجعت للكوخ .. شوي وتطق الباب يوم فتح والقاه جايبه لنا خبز حار يجنن قلت له بكم ورفضت تعلمن تقول بلغتهم ( اكرام اكرام ) .. ومواقفهم بالكرم كثيره ربي يحفظهم ولايغير عليهم ..

- كثرة المساجد والاهتمام فيها شيء ملاحظ في تركيا ماشاء الله ..

~ الجزء الثالث والاخير ()

سُحُب

30 / 10 / 1430 هـ

الدلائل: السفر, السياحة, الشعب التركي, اوزنقول, تركيا, رحلة

هذه التدوينة دونت بتاريخ الإثنين, أكتوبر 19th, 2009 بتمام 8:23 م مدرجة تحت تصنيف || ابتسامة واستراحة. بإستطاعتك متابعة أي تعليق جديد من خلال RSS 2.0 feed. بإستطاعتك ترك تعليق على التدوينة.